Frame Contemporary Art Finland ohcá vásttolašvuođakoordináhtora oasseáigásaš ja mearreáigásaš bargogaskavuhtii áigái 17.10.2022–30.6.2024. Koordináhtor bargá sosiálalaš ja ekologalaš suvdilvuođa ja dásseárvvu temáiguin guovttejahkásaš EU ruhtadan Islands of Kinship: A Collective Manual for Sustainable and Inclusive Art Institutions -fidnus.
Frame Contemporary Art Finland (Frame-foanda) lea dáládáidaga áššedovdiorganisašuvdna ja dieđihanguovddáš, mii nanne suopmelaš dáládáidaga sajádaga sihke ovddida ovttasbarggu ruovtturiikka ja olgoriikkaid dáládáidaga ámmátolbmuid gaskkas.
Koordináhtora bargguide gullá árvvoštallat ja lasihit organisašuvnna máhtu ekologalaš suvdilvuođa, inklusiivvalašvuođa ja dálkkádatvuoiggalašvuođa nannejeaddji barganvugiin. Barggu váldobargogiella lea eŋgelasgiella.
Islands of Kinship (2022-2024) lea riikkaidgaskasaš fidnu, man Creative Europe -prográmma ruhtada. Eará fidnui oassálasti organisašuvnnat leat Jindřich Chalupecký Society (Praha, Čekkia dásseváldi), Faculty of things that can’t be learned (Bitola/ Skopje, Makedonia), Julius Koller Society (Bratislava, Slovakia), Latvian Centre for Contemporary Art (LCCA) (Riika, Latvia) ja Temporary Gallery (Köln, Duiska). Juohke organisašuvnnas bargá iežas fidnokoordináhtor.
Ovttasbargoprošeavtta mihttomearrin lea ovdánahttit gaskastuorra, iešguđetge Eurohpá guovlluin doaibmi dáládáiddaorganisašuvnnaid gaskkas oktasaš doaibmanvugiid ja geavadagaid, mat ovddidit inklušuvnna, oktiigullevašvuođa ja demokráhtalašvuođa, ja duddjot geavatlaš čovdosiid ekologalaš suvdilvuođa ja ehtalašvuođa vuhtiiváldimii.
Vásttolašvuođakoordináhtora bargun lea árvvoštallat organisašuvnna strategiija ja doaimmaid, ja čiekŋudit vásttolašvuođa vuhtiiváldi doaibmanvugiid máhtu. Koordináhtor čohkke data, evttoha buorádusaid ja rahkada rávvagiid ovttas guoibmeorganisašuvnnaiguin. Iežaset organisašuvnnain barggu lassin koordináhtorat hábmejit verddefierpmádaga, mas sii juogadit iežaset čohkken dieđu, oahpu ja ovddidanevttohusaid.
Frame vásttolašvuođakoordináhtorin don barggat Frame prográmmahoavddain ja du dehálamos barggut leat:
- Čohkket dieđuid ja árvvoštallat Frame doaimmaid dásseárvui, ekologalaš suvdilvuhtii ja dálkkádatvuoiggalašvuhtii laktáseaddji doaimmaid ektui
- Koordineret servvodatvástui laktáseaddji barggu Frames
- Ovdánahttit ja evttohit ođđa doaibmanvugiid ja geavadagaid ovdal máinnašuvvon temáid olis
- Doallat oktavuođa ja bargat ovttasbarggu fidnoguoibmeorganisašuvnnaiguin
- Oassálastit Islands of Kinship -fidnu loahppaolggosaddima buvttadeapmái
Mii sávvat dus:
- Máhtu ja hárjánumi sosiálalaš ja ekologalaš suvdilvuođa ovddideaddji doaibmanvugiiguin bargamis kultursuorggis
- Hárjánumi prošeaktahálddašeamis ja raporteremis
- Beroštumi dáládáiddasuorgái
- Njuovžilis eŋgelasgiela máhttu lea vealtemeahttun barggus. Suomagiela dáiddus lea ávki barggus, muhto dat ii leat eaktun barggu bargamii.
Bargui gullá mátkkošteapmi.
Frame fállá:
- Riikkaidgaskasaš bargobirrasa
- Máŋggabealat ja vásttolaš bargguid
- Čavddis ja kollegialalaš bargoservoša
- Fierpmádagaid huksenvejolašvuođa riikkaidgaskasaš kulturorganisašuvnnaiguin
- Áššáigullevaš bargoreaidduid
- Mihttomearálaš bargoburesbirgenprográmma, masa gullet bargodearvvasvuođafuolahus, kultuvra- ja lihkadanseđelat, riikkaidgaskasaš ICOM -museakoarta ja jeavddalaš virkkosmahttinbeaivvit
- Oidnosa suopmelaš dáládáidaga riikkaidgaskasaš fidnuide ja govvadáidaga suorgái
Bálká ja áigi
Koordináhtora bargu lea oasseáigásaš (40 %). Jeavddalaš bargoáigi barggus lea 15 diimmu ja 20 minuhta vahkus, masa gullet boradanbottut. Barggus máksojuvvo 1 200 euro bálká mánus.
Frame birra
Frame doaimmahat lea Helssegis ja barggus lea vejolašvuohta bargat oasil gáiddusin. Organisašuvnna bargogielat lea suomagiella ja eŋgelasgiella. Frame doaimmahat ii leat johtineasttaheapmi. Lassedieđuid doaimmahaga easttahisvuođas ja juvssahahttivuođas gávnnat dán liŋkka bokte.
Frame ovdánahttá ovttaveardásašvuođa doaimmainis. Mii sávvat ohccin iešguđetge ahkásaš, eará sohkabeliid ovddasteaddjiid sihke giella-, kultuvra- ja eará unnitloguide gullevaš olbmuid. Don sáhtát máinnašit ohcamušas juos gulat muhtin máinnašuvvon jovkui. Mii gieđahallat buot du addin dieđu luhtolaččat.
Ná ozat
Sádde midjiide sullii ovtta siiddu guhkkosaš eŋgelasgielat ohcamuša, mas don válddahalat, manin ozat dán bargui ja mat livčče du nanusvuođat barggu dikšumis. Sádde dan ja iežat ánsologahallama oktan PDF-fiilan maŋimustá sotnabeaivve 18.9.2022 čujuhussii rekry@frame-finland.fi. Čále šleađgapoastta bajilčálagieddái “Social Responsibility Coordinator 2022” ja atte PDF-fiilii nama hámis Ovdanamma_Sohkanamma.
Jearahallamat bargui lágiduvvojit ohcanáiggi nohkama maŋŋá ja jearahallin doaibmaba Frame prográmmahoavda Jussi Koitela ja jođiheaddji Raija Koli. Jearahallan bistá sullii 45 minuhta. Jearahallamii válljejuvvon ohcciide sáddejuvvojit jearahallangažaldagat ja rávvagat ovddal gihtii.
Dát ohcanalmmuhus lea almmustahtton suomagillii, eŋgelasgillii ja davvisámegillii.
Lassedieđut Islands of Kinship -fidnus (suomagillii dahje eŋgelasgillii)
Lassedieđuid barggus addá:
Jussi Koitela
Prográmmahoavda
jussi.koitela@frame-finland.fi
tel. +358 50 471 7711